Mende sığar iki cihân men bu cihâne sığmazam
Cevher-i lâ-mekân menem kevn ü mekâne sığmazam
Kevn ü mekândur âyetüm zâte gider bidâyetüm
Sen bu nişân ile meni bil ki nişâne sığmazam
Kimse gümân ü zann ile olmadı Hakk ile biliş
Hakkı bilen bilür ki men zann ü gümâne sığmazam
Sûrete bak vü ma'nîyi sûret içinde tanı kim
Cism ile cân menem velî cism ile câne sığmazam
Hem sadefem hem inciyem haşr ü sırât esenciyem
Munca kumâş ü raht ile men bu dükâne sığmazam
Genc-i nihân menem men uş ayn-ı 'ıyân menem men uş
Gevher-i kân menem men uş bahr ile kâne sığmazam
Arş ile ferş ü kâf ü nûn mende bulındı cümle çün
Kes sözini uzatma kim şerh u beyâne sığmazam
Gerçi muhît-i a'zamam âdem adumdur âdemem
Dâr ile kün fekân menem men bu mekâne sığmazam
Cân ile hem cihân menem dehr ile hem zamân menem
Gör bu latîfeyi ki men dehr ü zamâne sığmazam
Encüm ile felek menem vahy ile melek menem
Çek dilini vü epsem ol men bu lisâne sığmazam
Zerre menem güneş menem çâr ile penc ü şeş menem
Sûreti gör beyân ile çünki beyâne sığmazam
Zât ileyem sıfât ile Kadr ileyem Berât ile
Gül-şekerem nebât ile piste-dehâne sığmazam
Şehd ile hem şeker menem şems menem kamer menem
Rûh-ı revân bağışlaram rûh-ı revâne sığmazam
Tîr menem kemân menem pîr menem civân menem
Devlet-i câvidan menem âyinedâne sığmazam
Yer ü gökü düzen menem geri dönüp bozan menem
Cümle yazı yazan menem men bu dîvâne sığmazam
Nâra yanan şecer menem çarha çıhar hacer menem
Gör bu odun zebânesin men bu zebâne sığmazam
Gerçi bugün Nesîmîyem Hâşîmîyem Kureyşîyem
Mundan uludur âyetüm âyet ü şâne sığmazam
Yorumlar
Yorum Gönder